U piscistoccu chinu i pipi

Compari Ntoni aiva mbivirari l’ortu nta nChiusa. U turnu i l’acqua l’aviva versu i setti i sira, e prima mi nesci ra casa sa ddumurau mpocuceddu, mi nci runa u tempu a cumpari Ninu mi finisci. Quandu nci parsi a iddu pigghiau i stivali e u zappuni e si ndi iau a l’ortu. Mentri stava niscendu so mugghieri nci spiau a chi ura nc’iva a purtari a spisa e iddu, sapendu ca sirata era longa, nci rissi mi ncia porta versu l’ottu e menza.
Puntuali, quandu furunu l’ottu e menza so mugghieri ruau.
«Ntoni ti purtaia a spisa!».
«Mpoiala vicinu a scalinata, supra a l’armacia. Chi mi facisti?»
«Piscistoccu chi patati! E’ ancora caddu!».
«Tagghiu na para i prisi e poi mangiu!Nciu mintisti nu pocu i pipi (peperoncino)?».
«Si nciu mintia u sacciu chi ti piaci! Ora però mi ndi vaiu, i figghioli a casa sunnu suli!».
«Va bonu, ndi virimu chiù tardi!».
Cumpari Ntoni mentri mbivirava cuntinuava a pinsari o piscistoccu e non viriva l’ura mu su mangia, era quasi du uri chi tagghiava prisi e aviva na fami ra Maronna.
Tagghiau l’urtima prisa ra lenza e si sittau, iapriu a spisa e si mintiu mi mangia. Intra a spisa nc’era puru nu pezzu i pani i ranu e su nzuppau nto zucu.
Si va fattu scuru e non viriva nenti, ma appena si mintiu u primu pezzu i piscistoccu nta bucca, si nd’accurgiu chi brusciava chiù ru solutu.
«Va bo chi mi piaci u pipi, ma sta vota ma mugghieri esagerau!» pinsau.
Comunqui a fami era tanta e compari Ntoni si nittau tutta a tiella, puru se nta bucca pariva chi aviva u focu.
Quandu turnau a casa so mugghieri era ancora russigghiata e iddu, ca bucca chi ancora ittava focu, nci rissi «Ma quantu pipi nci, mintisti nto piscistoccu?»
«Nu pezzu, comu o solutu!» nci rispundiu.
«E chi pipi era, aiu u focu nta bucca!»
A matina compari Ntoni turnau nta l’ortu e, mentri passava ra scalinata, aundi so mugghieri aviva pusatu a spisa, vitti, da nterra, nu solu i furmiculi russi morti e autri chi trasiunu e nisciunu ra tana e subutu capisciu pirchì u piscistoccu brusciava!
Cu sapi quanti furmiculi si va mangiatu, sicuramenti na tiella bedda china!