U piritu

Prima chi nu previti ‘ntelligenti (ma ricu ieu nveci chi a Favazzina, no putiunu mandari a Sprimunti nta nu paisi spirdutu nmezzu e muntagni?) ndi cacciava i scaluni ra cresia, tutti nui, vecchi e giuvini, randi e picciriddi, nta stati e nto bernu, i notti e i iornu, ndi sittammu nte scaluni. Quantu ndi vitturu passari ddì scaluni e quantu ndi putissiru cuntari. Na sira, quandu ieu eru figghiolu, nte scaluni ncerunu sittati chiddi chiu randi i mia e cu iddi ncera sittatu puru Cicciu u parmentaru, u chiu famusu piritaru i Favazzina. Era sittatu nta l’urtimu scaluni, ‘npizzu a ‘npizzu e zanniava ‘nsemi all’autri. I ddì tempi nto paisi non ncerunu machini chi iaunu e viniunu e si stava nta santa paci. A genti era sittata ca seggia fora ra porta e si pigghiava u friscu rurmicchiandu o riscurrendu ti chistu e i chiddu. Nta chiazza non si sintiva nuddu rumuru, sulu i buci in luntananza ri figghioli chi iucaunu nda Filanda. All’intrasattu Cicciu u parmentaru si piegau i latu e ittau nu piritu chi fici trimari a terra, na cosa i l’autru mundu. Non vogghiu esagerari ma u sintirunu finu a Scilla. Chiddi sittati nte scaluni cu iddu si sciancarunu ri risati, mentri a genti sittata fora nte porti si vutau meravigghiata, puru chiddi chi rurmiunu, i corpu, si russigghiarunu.
«A Maronna chi botta»
«Pariva nu corpu i murtaru»
«Minchia u rumpiu u scaluni»
«E chi mangiasti fasciola a fau»
Ma a mugghiu fu chidda chi rissi «Oh figghiu binirica! U Signuri mi ti runa furtuna e mi ti faci a razia»