U Longu e i cippi

Comu a maggioranza i vui sannu, na vota, a Vigilia i Natali, si dumaumu i cippi nta chiazza (Malumbra l’imu a ripristinari sta tradizioni) e tutti nui a sira, a partiri ri primi i dicembri, iamu nta l’orti mi pigghiamu. U puntu i ritrou era nta chiazza e quandu tutti ndi cugghiumu, partiumu o pa Sena oppuru pa Favareca. L’urtumu chi rivava era sempri u Longu e quandu u viriumu spuntari pacificu, ca so flemma, i dumandi erunu sempri i stessi
«Ma si sempri l’urtumu!»,
«Ma aundi minchia eri?»,
«Chi cazzu stavi facendu?».
U Longu non si scumpuniva e cu sorriseddu enigmaticu ndi rispundiva
«Cu va chianu va sanu e va luntanu!»,
«A iatta presciarola fici i iattareddi orbi»,
«Cu si vardau si sarbau!» chi era poi u so proverbiu preferitu.
A diri a verità u Longu, a parti a compagnia, non è chi era indispinsabili chiù i tantu, pirchì cu iddu, nuddu si vuliva mbuttari i cippi (i purtaumu a dui a dui), non pirchì non c’a faciva, anzi, ma essendu chiù iuato i tutti, sbilanciava u pisu tuttu i na parti (nci vuliva Galanti) e chiddu chiù curtu si rumpiva u culu ra fatica. Pirciò o ndi iutava mi ndi mbuttamu i cippi supra e spaddi o purtava, quandu nc’eruno, chiddi chiù picciriddi, da sulu. Quando ruaumu nta l’orto, circaumu mi facimu chiù in fretta possibili, pirchì non tutti i cuntadini vulivunu mi nci pigghiamu i cippi, e poi tra nui nc’erunu chiddi chi non vardaunu nenti e nci panticaunu i surchi e tutta a chinatimi o nci futtiunu rangi e mandarini, facenduli ncazzari ancora chiù ssai. Tutti i voti quandu aiumu finutu e erumu pronti mi turnamu nta chiazza, nd’accurgiumu chi mancava sempri u Longu.
«Aundi cazzu è?»,
«Chi fini fici?»,
«Possibili chi manca sempri iddu?».
Aundi era u Longu? Nguattatu sutta na mandalinara (era l’arburu chi priferiva) a fari i so bisogni.
Iti a sapiri chi u Longu era stiticu (giustamenti vi dumandati e tu comu u sai? Cu non caca in cumpagnia….) e ndi faciva sulu unu longu, longu, ma no faciva drittu o nturcigghiatu, ma cu nu muvimentu prima arretu e poi i latu ru bacinu, a desra pi l’esattezza, disignava na “L” quasi perfetta, a so iniziali, propriu comu faciva Zorru, sulu cu Longu inveci ra spada usava natra cosa. Quandu finiva i fari u so capulavuru, finalmenti ruava (pinsati se l’iniziali ru so soprannomi cuninciava ca “B”). Ncazzati pu tempu chi nd’iva fattu perdiri mu spittaumu, nci spiaumu
«Aundi ti vi cacciatu?»,
«Chi stavi cumbinandu?».
Ndi rispundiva in italianu cu du surriseddu nta faccia comu a vulirti pigghiari pu culu «Gli ho lasciato un ricordino».
«A cumbighiasti almenu? Se no quandu a viri u cuntadinu pensa chi nci futtimmu i mandarini e s’incazza!»
e ca viniva fora u srafottismu ru Longu «E cu s’ndi futti! Pi mia poti pinsari chiddu chi cazzu voli!».
E scutendu a testa, chi cippi supra e spaddi, turnaumu nta chiazza, pronti a sira ropu mi turmamu natra vota mi pigghiamu, pirchì pi nui era chidda a cosa chiù importanti, cugghiri i cippi e tiniri viva a tradizioni ri nosri patri e, ancora prima i iddi, ri nosri nonni .