E u mericanu cantava

Una ri cosi chi u mericanu era cunvintu i sapiri fari, era cantari e quandu iaumu mu truamu o passaumu ravanti a so casa u sintiumu sempri gorgheggiari, ma chiù chi n’usignolu, ndi pariva na carcarazza.
Cantava spissu e vulinteri canzuni napulitani, ma u so pezzu forti era “Mamma”. Non sacciu se era pi chistu o pi qualchi autra ragiuni, ma un nvitaunu sempri a tutti i matrimoni. Ricimu a verità, i di tempi e matrimoni chiù chi pi divertirsi, unu iava sulu mi si inchi a panza, ma quandu nc’era u mericanu u divertimentu era ssicuratu. Finitu i mangiari solitamenti l’orchesra ttaccava a sunari e, prima i sposi, e poi i nvitati, si ncuminciava a ballari. U mericanu bugghiva sittatu nta seggia spittandu mi riva u so mumentu. Poi quandu i nvitati stanchi i ballari si sittaunu (sulu Paulu Cagna non si stancava mai, cu so modu curiusu i ballari, pettu avanti e culu arretu. Cu non su ricorda?) ncuminciaunu a gran vuci mu chiamunu mi canta. U mericanu prima si faciva priari, facendu finta chi non vuliva, poi quandu i chiù spiritusi u purtaunu quasi i pisu davanti all’orchesra, faciva na facci comu a diri chi oramai, anchi vulendu, non si putiva chiù tirari arretu e ttaccava a cantari. Ropu i primi dui o tri tentativi i l’orchesra mu faci iari a tempu, scunsulati u faciunu cantari pi cazzi soi. Ncuminciava prima chi canzoni napulitani, Torna a Surrientu, Reginella, O sole mio, ma chiù chi canzuni in dialettu napulitanu, pariunu in calabrisi, poi quandu viriva chi nvitati erunu beddi caddi, tra n’ovazioni generali cantava Mamma. Tutti griraunu e battiunu i mani e, tra u so italianu chi nci vuliva l’interpriti e du burdellu, a sula parola chi si capisciva era mamma. Quandu a canzuni finiva, era nu tripudiu e u mericanu, surridendu e facendo nchini, chi lacrimi all’occhi (Mamma u cummuviva sempri!), ringraziava tutti i nvitati. A du puntu, comu faciunu sempri, nci circaunu u bis tra a disperazioni i l’orchesrali chi pinsaunu chi oramai iva mbastatu. Comu vuliva Diu finalmente u mericanu si sittava, anchi pirchì, chiù i di dui o tri canzoni autri, pi furtuna, non di sapiva e tra cumplimenti e sritti i manu, ancora nu pocu frasturnatu e chi ricchi chi nci zumbicaunu, ringraziava a tutti natra vota e nci rava ppuntamentu o prossimu matrimoniu aundi, pi ccuntintari i nvitati, avribbi cantatu natra vota Mamma.