E u mericanu si sintiu mali

Questo post l'avevo messo nel blog giusto un anno fa, ma Malumbra mi ha chiesto di riproporlo in maniera più sintetica soprattutto per i nuovi arrivati.

Na sira ieu, u Longu, Macisti e Enzu erumu sittati, comu o solitu, nte scaluni ra cresia e cu nui nc’erunu puru Biasi e G.
Tutt’ ncorpu sintimmu comu nu lamentu, chi ruava ra parti aundi aviva a casa u mericanu, ma diversu i chiddu i nu cristianu, pariva chiuttostu chiddu i nu cani, nu cani rabbiusu, cusì fortì, tantu mu putimu sintiri finu nta chiazza.
Ieu, Macisti e u Longu non nci barammu chiù i tantu, Enzu inveci vuliva mi iaumu mi virimu. Nci rissimu mi rassa iari, ma quandu sintiu nautru lamentu, non riniscimmu chiù mu tinimu. Puru nui nci iammu a retu e anita scindimmu pi nta marina. Ficimu na para i passi e nd’accurgimmu chi lamenti ruaunu ra casa ru mericanu. Subutu fuimmu e, Enzu pi primu, trasimmu tutti nta casa, mentri nautru lamentu chiù forti i chiddi i prima, ndi fici satari pi l’aria. Nta cucina non c’era nuddu e trasimmu, unu arretu a l’autru, nta camera i lettu.U mericanu era curcatu nto lettu, iancu comu a nu linzolu, pariva mortu! Qundu tutti trasimmu, si sulluau i botta nto lettu e llungau i brazza avanti, comu a unu chi voli fari ginnastica. U fici tantu veloci chi a papalina chi aviva nta testa, nci cariu supra all’occhi e fici nu ruttu chi rintronau pi tutta a stanza e grirandu «Moru!» si bandunau nto lettu comu nu mortu. A scena fu cusì tragica e nto stessu tempu cusì comica chi ieu, Enzu, u Longu e Macisti ndippumu a tiniri pi non scoppiari a ririri. Biasi era chiddu chiù prioccupatu e nci spiau comu stava «Moru!» nci rispundiu, cu nu filu i vuci, e sulluandusi natra vota, fici a stessa cummedia i prima. A du puntu non riniscimmu chiù mi ndi trattinimu e fuimmu nta cucina rirendu a chiù non pozzu. Biasi e G. ristaru cu mericanu e sintimmu chi nci spiaunu se vuliva chi nci chiamaunu u mericu «Aundi u truati u mericu a sta ura!» nci rispundiu e siccomu nci viniva i vomitari (si va futtutu nu mutulu sanu, sanu) nci rissi se nci faciunu na uccia i acqua e limuni e datu chi nc’erunu, era bonu se nci mintiunu na cucchiarata i bicarbunatu. Parrava cu na vuciuzza debuli, debuli e ruttava in continuazioni. Puru biasi non rinisciu chiù mi si teni e nisciu rirendu peggiù i nui. L’unicu chi rinisciu mi rimani seriu fu G. e nci fici l’acqua e limuni cu dintra u bicarbunatu comu vuliva u mericanu. Intantu nui ndiumu carmatu e trasimmu nta camera i lettu arretu a iddu. G. nci resi a tazza e u mericanu ncuminciau mi nbivi. Fici in tempu mi si cala nu nghiuttuni, chi u bicarbunatu fici effettu e ittau nu ruttu cusì putenti chi vitri ra finesra trimarunu. Ndi vardau e fici na faccia sufferenti comu a vuliri riri «Viriti chi staiu mali pi davveru?». E cu putiva resistiri e fuimmu natra vota nta cucina cu l’occhi chini i lacrimi pu tantu ririri. A du puntu Macisti si scatenau e facendu finta chi u mericanu stava murendu veramenti, vosi mi ndi spartimu a so roba e pi fari i cosi seriamenti vosi mi facimu u testamentu. Vi putiti mmaginari i risati, a nautru pocu muriva Enzu o postu ru mericanu. Comunqui a Biasi, datu chi era zappaturi nci tuccau l’ortu, a Enzu a cucina, o Longu a camera i lettu, a mia u pianu i supra e iddu, datu chi nci mbivirava i limuni, si tinni a vigna. Certu chi si u mericanu i l’autra stanza ndi putiva sintiri, comu minimu na tuccata i cugghiuni sa faciva. Nto frattempu si va nu pocu ripigghiatu e ndi chiamau mi ndi ringrazia pirchì iumu iatu mu truamu, poi siccomu era stancu ndi rissi chi vuliva rurmiri.U salutammu, ma non sacciu mancu ieu comu riniscimmu mi ristamu seri. Ma appena niscimmu fora, ripinsandu o mericanu e a tuttu chiddu ch’iva succirutu, ripigghiammu a ririri chiù forti i prima.