A francisi e u blog i Favazzina

Figghioli non è chi mi vogghiu nvintari storie o u fazzu pirchì vi vogghiu fari ririri, ma chista mi capitau pi davveru! Non sacciu so sapiti ma i chist’annu sugnu in pensioni, ma fazzu u consulenti pa ditta aundi travagghiava prima. Na chindicina i iorna fa, vinniru tri francisi, du masculi e na fimmina, mi nci nsignu u lavuru. Nta pausa, finitu i mangiari, fuia subitu in ufficiu e mi cullegaia cu blog. Stava rispundendu a na dumanda chi m’aviva fattu Arcade riguardu u post “U piritu”, quando ruau a fimmina francisi. Siccomi m’aviva ruttu chi sapiva u glisi e u spagnolu e chi vuliva mparari u talianu, si mintiu mi leggi, u piritu.
«Monsieur Velardì (cu l’accentu supra a i) casa vuol dire piritu?». Fici finta chi non sentu e idda ancora na vota «Monsieur Velardì (sempri cu l’accentu supra a i) casa vuol dire piritu?».Vui chi cazzu nci riciu? Ci pinsai na stampa e mi vinni mi nci ricu «Prurito! Vuol dire prurito» ma siccomu non capisciva, mi rattaia u brazzu e ci ripitia «Prurito!»
«J’ai compris! J’ai compris!» mi rissi, e menu mali chi capisciti pinsaia, so sapiva Cicciu u merdaru, cu sapi a undi nci viniva u pruritu. Ropu, vosi visitari u blog e vitti i vostri fotografì e si divirtiu assai e mi rissi se nci rava l’indirizzu. E cusì figghioli mei, grazi a nu piritu, nui e Favazzina ora simu famosi puru nta Francia.